قل متاع الدنيا قليل ".
شاب مصري يعثر على حقيبة بها 850 الف جنية ويردها كاملة لاصحابها رافضًا المكافأة 
مصر - متابعات
في وقت بقت فيه الأخبار اللي بنسمعها كلها عن الغش والطمع، طلع شاب مصري محترم يثبت إن الخير لسه موجود وإن ولاد الأصول عمرهم ما بينقرضوا .
محمد الشافعي، طالب بكلية الآثار بجامعة القاهرة ومن أبناء شبين القناطر بالقليوبية، كان رايح تدريب عادي جدًا مع صاحبه في منطقة صلاح سالم، لكن ربنا حط قدامه اختبار كبير .
وهم ماشيين لقوا شنطة مرمية تحت كوبري، في مكان مفيهوش غير عربيات معدية. الفضول خلاهم يبصوا يشوفوا فيها إيه، وكانت المفاجأة... 850 ألف جنيه ومجموعة أوراق وروشتات طبية .
أي حد كان ممكن يفكر في نفسه أو يعتبرها "رزق ساقه ربنا"، لكن محمد فكر في صاحب الفلوس اللي أكيد قلبه بيتقطع عليها .
استنى يمكن حد يرجع يدور عليها، ولما محدش ظهر بدأ يدور بنفسه على أصحاب الشنطة من خلال البيانات الموجودة في الأوراق، لحد ما وصل ليهم .
ولما قابلهم اتأكد الأول إنهم أصحابها الحقيقيين، وبعدها سلمهم الشنطة كاملة زي ما هي، ولا جنيه ناقص .
المفاجأة الأكبر كانت لما عرف إن أغلب المبلغ ده كان مخصص لعملية جراحية مهمة، وإن ضياعه كان ممكن يقلب حياة ناس بالكامل .
أصحاب الشنطة حاولوا يكافئوه بمبلغ 85 ألف جنيه، لكنه رفض بكل احترام، واكتفى بجملة واحدة لخصت معنى الأمانة كله :
" قل متاع الدنيا قليل ".
تحية من القلب للشاب المحترم محمد الشافعي، اللي رجع لنا الأمل إن لسه فيه ناس بتخاف ربنا، ولسه الأخلاق والأمانة عايشين بينا .
❤️ ألف تحية لابن الأصول .
